ATURAN PARPUNGUAN DI TINGKI PANAONON PASSION NI TUHAN JESUS (REMINISCERE)

ATURAN PARPUNGUAN DI TINGKI

PANAONAN PASSION NI TUHAN JESUS

MINGGU : REMINISCERE

1.     Hata Patujolo

2.    Marende B.E. No. 76 : 1 “Sada Nama...” BL. 199

ü  Sada nama sangkap ni rohangku, Di sandok portibion, ndang tagamon na so las rohangku, molo jumpang au inon. Naeng ma sai ingoton ni rohangku na binaen ni Jesus tu tondingku, uju pinorsanna i. Saluhutna dosangki.

3.    Tangiang :

Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia. Amen!

4.    Barita Passion – I

a.    Jadi diarahon Jesus ma na sampuluda i, jala didok ma tu nasida : na nangkok ma hita tu Jerusalem, jala tulus ma Anak ni Jolma i sasudena, na tarsurat di angka panurirang.

Ai pasahaton ma Ibana tu angka parbegu, gabe insahanna, leaanna jala tijuranna ma Ibana; dung i mulak mangolu ma Ibana di ari patoluhon. Alai ndang diantusi nasida agia otik sian i; na buni do Hata i sian rohanasida, ndang diboto nasida na hinatahonNa i. Dung i dipinsang angka Sintua ni malim i dohot angka Parise ma rapot godang, didok nasida : “Aha ma bahenonta? Ai lan do tanda dibahen Halak! Molo itapasombu Ibana, porsea ma halak saluhutna tu Ibana, gabe ro ma halak Rom mangarampas tanonta dohot bangsonta”

Alai hehe ma sada sian nasida, i ma si Kayapas, sintua ni malim di na sataon i, di dok ma tu nasida : “Na hurang roha do hamu! Ndang dipingkiri rohamuna, denggan do mate sahalak humophop natorop i, unang laho mago sandok bangso i”

Alai ndang sian rohana sandiri dihatahon i; ala sintua ni malim ibana di na sataon i umbahen disuriranghon, na naeng mate ma Jesus humophop bangso i. Alai tahe, ndada holan laho manghophop bangso i, alai naeng papunguonNa angka anak ni Debata, angka na marserak dope, laho pasadahon. Asa olat ni sadari i martuptup ma nasia laho mamusa Ibana. Alai didok nasida ma : unang ma di pesta i, sotung guntur natorop i.

b.    Dung i onom ari nari asa dapot Pesta Paska i, sahat ma Jesus tu huta Betania, na niinganan ni si Lazarus, na sinunggul ni Jesus sian na mate. Jadi dipaulinasida ma disi panganon ujuan di Ibana; si Marta do manghobasi, si Lazarus ma sa donganNa mangan disi. Gabe dibuat si Maria ma sahati miak Nardus na arga na so marsaor, dimiahi ma pat ni Jesus, obukna ma dibahen mangalapu. Jadi digohi uap ni miak i ma bagas i. Jadi sada sian angka siseanNa, si Judas Iskariot na naeng manjehehon ibana, mandok : “Boasa so digadis miak i arga tolu ratus hupang, bahen silehonlehon niang di angka na pogos?” Alai ndada na pogos sinarihonna, umbahen na didok ibana songon i, panangko do ibana tahe, diusung do asiasi ni halak, tu ibana do dipasahat puro i.

Dung i ninna Jesus ma : “Pasombu ma ibana, ai diparade do i hira tu ari hatatanomHi. Ai tongtong do adong na pogos di tongatongamuna, jala asal ma olo hamu, tarpatongon hamu do na denggan tu nasida; alai anggo Ahu ndang manongtong di hamuna. Intap na tarbahensa do na niulana i; na manjoloani do ibana mamiahi pamatangHu songon di na mananom. Situtu do hatangkon tu hamu. Manang di dia di liat portibi on dijamitahon muse Barita Na Uli on, hatahonna do nang binahenna i gabe baritana.

5.    Marende B.E. No. 152 : 1 “Jesus Na Mamorsan” BL. 120

ü  Jesus, na mamorsan dosa ni portibion, Pangolu hami! Jesus na mamorsan dosa ni portibion, sai pasonang hami. Amen, Amen, Amen.

a.    Dung i torang ni arina i, dibege halak natorop na ro tu pesta i, na naeng ro ma Jesus tu Jerusalem, jadi dibuat nasida ma maremare laho manomunomu Ibana huhut manjoujouhon : “Hosianna! Pinasupasu ma na ro marhite Goar ni Tuhan i, Raja ni Israel”. Dungi dapot Jesus ma halode sada, i ma dihunduli hombar tu na tarsurat : “Unang ho mabiar ale boru Sion, i da ma : Rajam do na ro, marsihundul di anak ni halode”. Jala halak Parise, dohot na deba sian natorop i mandok tu Ibana : “Orai antong angka siseanMi, Guru!” Alai ninna ma mangalusi : “Hudok ma di hamu aut mauhom nasida, manjoujou ma angka batu”

b.    Alai dibongoti sibolis i do si Judas na margoar Iskariot, sahalak sian na sampuludua i. Gabe laho ibana martuptup dohot angka sintua ni malim raphon angka panungganei, manang dia dalanna pasahathon Ibana tu nasida. Jadi sian las ni rohanasida marpadan ma nasida mangalehon hepeng tu ibana. Dioloi si Judas ma i, jadi dilului ma tingki na une pasahathon Ibana so sian pamotoan ni natorop i. Amen!!!

6.    Martangiang :

Martangiang ma hita : Ale Tuhan Debata, Amanami na di banuaginjang! Asi ma rohaM di hami halak na gale on. Diida Ho, na gogo do musunami, sai talu do hami dibahen, ala ni hagaleonnami. Dibahen i hupangido hami tu Ho : sai pargogoi jala pamonang ma hami maralohon musu i marhitehite panaonon ni Anak haholongan ni rohaM, Tuhan Jesus Kristus. Amen!!!

7.    Marende B.E. No. (P. Pelean II - )